Ёш теннисчимиз кучли рақибини 2,5 соат "қийнади"

Олдин хабар бериб ўтганимиздек, айни кунларда Мисрнинг Каир шаҳрида "Фьючерс" туркумига кирувчи турнир бўлиб ўтмоқда. Мукофот жамғармаси  15 000 АҚШ долларини ташкил этувчи турнирда ҳамюртимиз Сергей Фомин ҳам иштирок этмоқда.

Бугун 16 ёшли теннисчимиз иккинчи давра баҳсида франциялик Томас Брешемьега қарши кортга чиқди. АТP рейтингида 1031-ўринда бораётган Фомин ушбу рейтингда 467-поғонада кетаётган теннисчига қарши 2 соат 30  дақиқа кортда ҳаракат қилди.

Кучли рақибига муносиб қаршилик кўрсатган Фоминга бироз тажриба етишмади ва 4:6, 6:4, 3:6 ҳисобида имкониятни бой берди ва турнирдаги юришига якун ясади.