Чарчаб қолган Ферузбекни нокаут қилишди
Россиянинг Челябинск шаҳрида ташкил этилган профессионал бокс кечасида ўзбекистонлик Ферузбек Йўлдошев WBC йўналиши бўйича Asian Boxing Council Silver lightweight title - Осиё кумуш камари учун мезбонлар вакили Рустам Нугаев билан жанг қилди.
Ферузбек Йўлдошев 2015 йилнинг кузидан буён профессионал рингдаги жангларда қатнашмоқда. Шу кунгача ҳамюртимиз саккизта ғалаба ва битта мағлубият қайд этган эди.
Ҳамюртимизнинг рақиби Рустам Нугаев эса фаолиятини 2001 йили бошлаган. Кучли зарбага эга боксчи 28 та ғалабадан 18 тасини муддатидан олдин қўлга киритган. Шунингдек, битта жангда дуранг қайд этиб, етти маротаба мағлуб бўлган.
Осиё кумуш камари учун ўтказилган 10 раундлик жанг охиригача давом этмади. Дастлабки раундларда ўта фаол ҳаракат қилган Ферузбек беллашувнинг иккинчи ярмида толиқиб қолди. Бундан унумли фойдаланган тажрибали Рустам Нугаев саккизинчи раундда Ферузбек Йўлдошевни техник нокаутга учратди.
Рустам Нугаев шу тариқа ўтган йили қўлга киритган Asian Boxing Council Silver камарини ўзида сақлаб қолди.
Фикрлар