Сўнгги мактуб. Хайр, Клаудио Раньери!!!

 

"Лестер Сити” раҳбарияти жамоанинг АПЛдаги омадсиз иштироки сабаб клуб бош мураббийи Клаудио Раниерини истеъфога чиқаришга қарор қилди.

АПЛнинг ушбу мавсуми бошлангандан буён фақатгина беш учрашувда ғалаба қозона олган ”тулкилар” чемпионат билан хайрлашишга деярли яқин туришибди. Улар турнир жадвалининг сўнгги уч поғонасидан бирини ”забт” этиш учун “аутсайдерлар”дан атиги бир очко кўпроқ жамғарган холос.

Европа матбуотида 65 ёшли мутахассиснинг ишдан олинганлиги тўғрисидаги маълумотлар аллақачон тарқаб бўлган бир пайтда, клубнинг расмий сайти юқоридаги хабарни тасдиқлади.

“Клаудио Раниери, 2015 йилнинг июль ойида “Лестер Сити” клубининг бош мураббийи этиб тайинланган эди. Ортда қолган вақтлар давомида жамоамиз вакиллари унинг самарали уринишлари эвазига “Лестер Сити” клуби ўзининг 133 йиллик тарихида улкан бурилиш ясай олди. Биз тарихда биринчи бор Англия Премьер Лигаси ғолиблигини қўлга киритдик. Шубҳасиз, у жамоанинг барча даврлардаги энг яхши мураббийи сифатида қайд этилади.”

“Бироқ, АПЛнинг ушбу мавсумидаги натижалар сабаб, жамоа турнир жадвалида жуда ноқулай вазиятга дуч келди. Шунинг учун, клуб раҳбарияти жамоа мураббийлар штабида жиддий ўзгаришни амалга оширишга қарор қилди.”

“Бу қарорни қабул қилиш жуда ҳам қийин бўлди, албатта. Бу қарор ҳатто жамоанинг бош ҳомийси “King Power International Group”нинг сўнгги етти йил ичида қабул қилган энг мураккаб қарори деб аташ ҳам ўринлидир. Бироқ гап жамоамизнинг тақдири ҳақида борар экан, барчамиз учун қадрли инсон, Клаудио Раниерини истеъфога чиқаришга мажбур бўлдик.”

“У жамоага ўзгача илиқлик олиб кира олган тажрибали мураббий эди. Унинг мураббийлик салоҳияти билан биргаликда, жамоа вакилларини ҳар қандай вазиятда ҳам руҳлантира олиш қобилияти “Лестер Сити”нинг барча ютуқларига улкан ҳисса қўшди. Биз жаноб Раниерининг жамоамиз равнақи учун тақдим этган барча ёрдамидан миннатдормиз ва у билан ҳамиша яхши алоқада бўлишга умидвормиз.”

Фикрлар

Фикр қолдириш учун авторизациядан ўтинг!