“Реал” Мбаппедан кейин яна бир супертрансферга киришди

Ёзда ПСЖ ҳужумчиси Килиан Мбаппе “Реал” сафини тўлдириши кутилмоқда. Орзусини рўёбга чиқараётган “Қироллик клуби” президенти Флорентино Перес кейинги катта трансферлар ҳақида бош қотира бошлади.

TodoFichajes нашрининг ёзишича, клуб хўжайини жамоага Бундеслиганинг энг иқтидорли ҳужумкор футболчиси Влориан Вирцни таклиф қилишни режалаштирган.

Флориан Вирц ёш бўлишига қарамай, бир неча мавсумдан бери “Байер”нинг етакчиси бўлиб турибди. Бу йил леверкузенликлар чемпионликни қўлга киритди ва тарихий ғалабада Флорианнинг ҳам хизмати катта бўлди.

Трансфер экспертларининг маълум қилишича, Вирцни олиш осон бўлмайди. Бироқ Флорентино Перес бу борада шошилмоқчи эмас. Клуб хўжайини ҳудди Килиан Мбаппе билан бўлганидек, бу трансферга узоқроқ вақт сарфлашга ва уни босқичма босқич амалга оширишга тайёр.

Уддабурон Переснинг режасида Карло Анчелоттидан кейин жамоа бош мураббийлигига “Байер”ни чемпион қилган Хаби Алонсони олиб келиш мақсади бор. Агар бу иш амалга ошса, Флориан Вирц трансфери ҳам ортиқча муаммо бўлмайди.