“Реал” мухлислари Хавига мурожаат қилди

Испания чемпионатининг 32-турида “Реал” ўз майдонида “Барселона”ни қабул қилиб, қийин ўтган учрашувда 3:2 ҳисобида ғалаба қозонди.

Бу натижа мадридликларни чемпионликка, каталонияликларни ўтган йили қўлган киритилган чемпионлик унвонини ашаддий рақибга тақдим этишга яқинлаштирди.

“Эл класико”да Карло Анчелотти шогирдлари икки марта камбэк амалга оширишига тўғри келди. Ғалаба тўпи ўйин якунланиши арафасида Жуд Беллингем томонидан киритилди.

“Сантьяго Бернабеу”га жамланган 78 минг нафарга яқин мухлис “Барселона” бош мураббийи Хави Эрнандесга  мурожаат қилиб, “Хави, қол!”, деган чорловларни айтди.

Маълумки, Хави Эрнандес жорий мавсум якунланиши билан клубни тарк этишини билдирган. Испаниялик мутахассис қўл остида жамоа қайд этаётган натижалар каталониялик мухлисларни қониқтирмаяпти.

“Барселона” чемпионатнинг биринчи даврасида ўз майдонида “Реал”га қарши ўтган баҳсда ҳам 1:2 ҳисобида енгилганди. Ашаддий рақибнинг “Реал” учун қулай жамоага айланиб қолаётгани мадридлик мухлисларга жуда ёқяпти.