Икки яраланган шер ёхуд ОКМК - "Насаф" тўқнашуви олдидан

Бугун Суперлигада 6-турнинг сўнгги иккита ўйии ўтказилади. Тошкентда “Пахтакор” “Металлург”ни қабул қилса, Олмалиқда ОКМК Қаршининг “Насаф”и билан беллашади. Айниқса, Миржалол Қосимов ва Рўзиқул Бердиев қарама-қаршилигига қизиқиш ҳам, эътибор ҳам катта. Уларнинг жамоалари яқинда Ўзбекистон Кубоги гуруҳ босқичида муваффақиятсизликка учрадилар ва курашни тўхтатдилар. Шунинг учун ОКМК ҳам, “Насаф” ҳам яраланган шер каби энди чемпионат ўйинларига киришмоқдалар.

Айни пайтга келиб, иккала клубда 8 тадан очко бор ва мос равишда 5- ҳамда 6-ўринларни банд этиб турибдилар. Фақат фарқи шундаки, “Насаф” 4, ОКМК эса  5 та учрашув ўтказган. Қаршилик футболчилар гарчи Кубок доирасида ютқазган бўлишига қарамай, ҳали Суперлигада мағлуб бўлганлари йўқ. Қисқаси, иккала клубни яраланган шерга қиёслашимиз мумкин. Ғалабадан бошқаси бу жамоаларни мутлақо қониқтирмайди.

ОКМК – “Насаф” ўйинларининг ўзаро тарихига келадиган бўлсак, шу пайтгача чемпионатимиз мобайнида 34 марта тўқнашишган. Катта устунлик “Насаф” тарафида эканини кўрсатяпти. Боиси, ОКМКда 5 та ғалаба бўлса, “Насаф”да бу рақам 15 ни ташкил қиляпти. Яна 14 та учрашувда дуранг қайд этилган. Тўплар нисбати ҳам шунга яраша 30х51 меҳмонлар фойдасига.

ОКМК – “Насаф”нинг илк ўйини 2008 йилнинг 10 май куни бўлиб ўтган. Ўшанда беллашув Қаршида ўтказилган ва унда мезбонлар 1:0 ҳисобида ғалаба қозонган. Ўтган йили “Насаф” ўз уйида ОКМКни 2:0 ҳисобида таслим қилган. Иккинчи даврадаги баҳсда эса 1:1 натижаси кузатилган.

Қосимов ва Бердиев шогирдлари охирги бор ўтган йили Ўзбекистон Кубоги финалида куч синашишгани ёдингизда бўлса керак. 2023 йилнинг 12 ноябрь куни Қаршида бўлиб ўтган ҳал қилувчи ўйинда “Насаф” ОКМКни 1:0 ҳисобида енгиб Кубокни боши узра кўтарган. Ўшанда ягона гол Жавоҳир Сиддиқов томонидан киритилган.

Олмалиқликлар “Насаф”ни охирги марта 2020 йилги чемпионатда мағлубиятга учратишган. Ўшанда биринчи даврадаги беллашувда ОКМК 2:1 натижаси билан ғолиб чиққанди. Бугун шубҳасиз турнинг марказий ўйини мақомида. Иккала клуб ҳам хато қилишдан эхтиёткор бўлиб ўйин кўрсатишини кутса бўлади. Аммо ғалаба барибир икки жамоа учун ҳам муҳим.