"Барселона"нинг янги мавсумдаги асосий таркиби қандай бўлади? Биз 3 хил вариант таклиф этамиз!

Бу содир бўлди! Роберт Левандовски "Барселона" сафига келиб қўшилди. Эътиборлиси шундаки, форвард Каталонияга кўчиб кетиш учун қўлидан келган барча ишни қилди. Очиқчасига кетмоқчи эканлигини айтибгина қолмай, Хави қўл остида кичикроқ маош эвазига тўп тепишга ҳам рози бўлди. Агар Фабрицио Романо айтган гап тўғри бўлиб чиқса, "Бавария" польякнинг трансферидан 50 миллион евро ишлаб олган.

Аслида, бугун бу ҳақида сўзлашмоқчи эмасмиз. Хўш, энди "Камп Ноу" эгаларининг ҳужуми қандай кўриниш олади? Келинг, бир нечта схема ёрдамида фантазияни ишга соламиз! Ҳар ҳолда, нақд 7 та ҳужумчиси бор жамоа қандай ўйин схемасидан фойдаланиши барчага қизиқ бўлса керак!

Ёзда таркибга қўшилган Рафинья ва Левандовскидан ташқари, Мемфис Депай, Пьер-Эмерик Обамеянг, Ферран Торрес, Ансу Фати ва Усман Дембелега бир вақтда майдонда жой топиб бериш осон бўлмаслиги турган гап.

Аслида, "Барселона" таркибида ҳозир "катта" номлар кўп, аммо польяк шунда ҳам улардан ажралиб туришни уддаламоқда. Шу боис, у биз таклиф этадиган барча схемаларда асосий ҳужумчи образида қолади. Боз устига, Хави 4-3-3 схемасидан фойдалангани боис, айрим футболчиларнинг жойини ўзгартирган ҳолда, асосий таркибга киритишга уринамиз.

Хўш, биринчи кўриниш: Чапда Депай, ўнгда Рафинья.

Иккинчи кўриниш: Чапда Обамеянг, ўнгда Торрес.

Учинчи кўриниш: Чапда Фати, ўнгда Дембеле.

Бонус тариқасида, яна бир схемани эътиборингизга тақдим этамиз. Тасаввур қилиб кўринг, агар "Барселона" сўнгги дақиқаларда мағлубиятдан қутулиб қолиш учун таваккалга қўл урса, схема қандай бўлади? Деярли барча ҳужумкор футболчилар майдонда бўлгани боис, таркиб анчайин ўзгача кўриниш олиши мумкин. 3-4-3 ёки 3-2-5 схемаси ҳам Хави томонидан қўлланилиши ҳеч гап эмас. Ўз вақтида, Пеп Гвардиола фавқулодда ҳолатларда бундай ишга қўл урганини бир неча бор кўрганмиз. Фати ва Рафинья қанотни ўз қўлига олса, олдинда Обамеянг-Дембеле-Левандовски учлиги пайдо бўлади.

Энг қизиғи шундаки, мана бу схемадан клуб фойдаланганда ҳам, иккита ҳужумчиси захирада қолиб кетади. Ферран Торресдан фарқли ўлароқ, Мемфис Депайнинг "Барса"ни тарк этиши анча ҳақиқатга яқинроқ.

Роберт Левандовскининг трансфери олдинги чизиқда яхшигина рақобатни ҳосил қилгани рост, аммо каталонияликлар аввалги даражасига қайтиши учун 33 ёшли футболчига суяниб қолмаслиги шарт. Нафақат ҳужум, балки бошқа зоналарда ҳам худди шундай рақобат яратилиши лозим. Хавининг максималист эканлигини инобатга олсак, "Барселона" тез орада яна трансферларга қўл уришини тахмин қиламиз. Воқеалар ривожини SPORTS.uz'да кузатиб боринг!

Я . У