O‘zbekiston terma jamoasi Isroilga qay tarzda imkoniyatni boy berdi? Mag‘lubiyat omili nimada?

Argentinada 20 yoshgacha futbolchilar o‘rtasidagi jahon chempionati davom etmoqda. Guruh bosqichini ijobiy hal qilgan O‘zbekiston terma jamoasi nimchorak finalda Isroil bilan kuch sinashdi.

Uchrashuvdan avval Isroil himoyaviy o‘yin uslubini tanlashini tahmin qilgandik. Biroq ular hamyurtlarimiz kabi imkon topildi deguncha hujumga o‘tdi. 

8-daqiqada Sherzod Esanov bo‘sh qolgan darvozani ishg‘ol qildi. Ammo hakam golni inobatga olmadi. Sababi hamyurtimiz Shahzod Ne’matjonov raqib posboniga qo‘pollik ishlatgandi.

Oradan 5 daqiqa o‘tib, Isroil ham javob berdi. Ya’ni o‘ng qanotdan oshirilgan to‘pni raqib futbolchisi boshi bilan darvozaga yo‘naltirdi. Yaxshiyamki, to‘p ustunga tegib qaytganida himoyachilar tepib yubordi. Aks holda hisob ochilishi mumkin edi.

20-daqiqada Abbos Fayzullaev chap qanotdan jarima maydoniga yorib kirib, to‘pni sherigiga oshirdi. To‘p yo‘l-yo‘lakay raqib himoyachisining oyog‘iga tegib Sherzod Esanovga kelib tushdi. Hujumchimiz kutilmagan holat bo‘lgani uchun to‘pni to‘xtatmay zarba berdi. Ammo uning nishoni to‘sin bo‘lib chiqdi.

Taym oxirlariga yaqin chap qanotdan uzatilgan to‘pni Zafarmurod Abdirahmatov erga tushirmay kuchli zarba bilan darvozaga yo‘lladi. Posbon xavfni bartaraf etdi.

Tanaffusdan so‘ng ikki jamoada uzoq masofadan zarbalar ko‘paydi. Bu murabbiylarning ko‘rsatmalari. Biroq ikki tomon ham aniqlik borasida maqtana olmadi.

O‘yinning uchdan ikki qismi o‘tib borayotganda biroz jarohat olgan Shaxzod Ne’matjonov o‘z o‘rnini Po‘latxo‘ja Xoldorxonovga bo‘shatib berdi. Keyin esa Ravshan Haydarov zaxiradan Nodir Abdurazzoqov va Mahmud Mahamadjonovni ham maydonga tashladi.

Xoldorxonov o‘yinga qo‘shilishi bilan yaratilgan vaziyatlarda raqiblarni aldab o‘tishga kirishib ketdi. Natijada hujumning xavflilik darajasi yo‘qoldi, aksariyat hollarda to‘pni oldirib qo‘ydi.

82-daqiqada raqib vakili El Yam Kansepolski ancha kuchli zarbasi bilan hisobni ochishga yaqin keldi. U tepgan to‘p yuqoridan o‘tib ketdi. Aks holda zarbani darvozabonimiz qaytirishi mushkul edi.

Taym oxirida Isroil terma jamoasi tashabbusni qo‘lga olib, o‘yinni hal qilishga urindi. Vaziyatlar sodir etdi. 90-daqiqada Hamza Shibili o‘ng tomondan oshirilgan to‘pni qulay vaziyatdan turib darvozaga yo‘naltirishda adashdi.

Futbolchilar almashtirish borasida Isroil termasi murabbiyining qarorlari to‘g‘ri bo‘lgani ko‘rindi. Zaxiradan maydonga tushganlar o‘yinni kuchaytirdi. Bizda esa aksi kuzatildi.

90+7-daqiqada jarima zarbasidan so‘ng Anan Xalaili darvozamizni ishg‘ol qildi. Bu futbolchi ham yaqindagina maydonga tushgandi…

Natijada terma jamoamiz alamli mag‘lubiyatga uchradi va jahon chempionatida nimchorak finalda to‘xtadik. Afsuski, yagona gol uchrashuv taqdirini hal qildi. Biz esa yaratgan vaziyatlarimizdan foydalana olmaganimiz uchun imkoniyatni boy berdik. Guruh bosqichidagi holat yana takrorlandi. Futbolchilarimizda sovuqqonlik etishmadi. Aksariyat bellashuvlarda hakamlar zararimizga ishladi va hokazo.

Lekin terma jamoamiz kichik mundialda ajoyib o‘yin ko‘rsatgani, guruhdan chiqish vazifasini bajarib, millionlar muxlislarga quvonch ulashganini e’tirof etib o‘tish darkor. Chempionatning yorqin jamoalaridan biriga aylandi, deb aytsak mubolag‘a bo‘lmaydi. Muhimi katta tajriba to‘plandi.

Bekzod ISAEV