Про лиганинг топ-7 трансферлари!

Бу йил про лигада ҳам интрига янада кучайиши, кураш ҳам янги сифат даражасига ошиши кутилмоқда. Чунки у ерда 8 та жамоа иштирок этмоқда ва ҳар бир ўз мақсади сари таркибини шунга яраша кучайтира олди.

Эътибор берган бўлсангиз, про лигада ҳам бир қанча яхшигина трансферларга қўл урилди. Айниқса, ўз олдига Суперлигага чиқиш вазифасини қўйган клублар томонидан сифатли харидлар амалга оширилди. Бу борада жамоалар номдор, 30 ёшдан ошган ўйинчиларни қўлга киритишга аҳамият қаратдилар. Қуйида про лиганинг топ-7 трансферлари ҳақида сўз юритамиз.

Баҳром Абдураҳимов

Андижонлик тиниб-тинчимас Баҳром Абдураҳимовнинг 2024 йилни про лигада ўтказиши кўпчилик учун кутилмаган янгилик бўлди. “Насаф”даги фаолиятидан кейин уни яна бемалол Суперлигада тўп сура олишини ва исталган жамоага фойдаси тегишига ишонганлар кўп эди. Бироқ Абдураҳимовни “Қўқон-1912” ўз сафига қўшиб олишга муваффақ бўлди. Шу тариқа, футболчи “Андижон”, “Пахтакор”, “Насаф”, “Металлург”, ОКМК, “Навбаҳор”дан кейин фаолиятида илк бор про лигада тўп суришга қарор қилди. Бу йил 36 ёшни қаршилайдиган ярим ҳимоячи про лигадаги топ-трансферлар қаторида.

Виталий Денисов

Россиядаги фаолиятидан кейин юртимизга қайтган ва бунга қадар “Сўғдиёна” ҳамда ОКМКда тўп сурган тажрибали Виталий Денисов янги мавсумни про лигада ўтказишга аҳд қилди. Бу борада “Бухоро” клуби ва унинг устози Улуғбек Бақоев футболчига жиддий қизиқди. Бунинг сабаби оддий: Денисов 2022 йилнинг ёзида “Сўғдиёна” клубига ўтишида ҳам жамоанинг ўша пайтдаги устози Бақоев ташаббус кўрсатганди. У эса “Бухоро” билан муваффақиятсизликка учраб, Суперлигани тарк этди. Янги мавсумда эса жамоани яна элитага қайтариш учун таркибни номдор футболчилар билан кучайтиришди ва бу борада мутахассис яна Денисовнинг хизматидан фойдаланишни лозим топди.

Шерали Жўраев

Футболчилик фаолиятининг катта қисмини “Қизилқум”да ўтказган қанот ярим ҳимоячиси Шерали Жўраев бу йилдан бошлаб бошқа жамоа шарафини ҳимоя қилмоқда. Навоийлик футболчи орада ОКМКда ҳам ўйнаб қайтганди ва яна “Қизилқум” шарафини ҳимоя қилиб келаётганди. Бироқ бу йил футболчи навоийликларга керак бўлмай қолдими ёки Шералининг ўзи кетишини истаб қолдими, билмадигу, ҳар ҳолда у про лигада “Шўртан” учун тўп суришни маъқул кўрди. Жўраев узоқ йиллар давомида “Қизилқум” сардори ва етакчиси сифатида мухлислар кўз ўнгида гавдаланиб келди. Энди мухлислар уни “Шўртан” либосида кўришларига тўғри келади.

Ҳумоюн Муртазоев

Мухлисларга яхши таниш яна бир ўйинчи – Ҳумоюн Муртазоев ҳам янги мавсумни про лигада ўтказмоқда. “Машъал” клуби тарбияланувчиси ва катта футболга ушбу жамоа орқали қадам босган ҳужумчи яна Муборакка қайтиб, “Машъал” аъзосига айланди. 31 ёшли ҳужумчи 2021 йилнинг ёзида “Машъал”дан “Турон”га трансфер қилинганди. 2024 йилда эса у яна собиқ клубига қайтиб келди. Шунингдек, Муртазоев “Насаф” ва “Бунёдкор” шарафини ҳам ҳимоя қилган. Айтиш лозимки, бу ҳужумчи бемалол Суперлига клубларидан бири тўп суриб голлар уриш имкониятига эга эди. Бироқ эндиликда “Машъал” яна унинг хизматидан фойдаланадиган бўлди.

Даврон Ҳошимов

Про лигадаги яна бир эътиборли трансферлардан бири “Бухоро” билан боғлиқ. Бош мураббий Улуғбек Бақоев ўз жамоасига тажрибали ҳимоячи Даврон Ҳошимовни ҳам таклиф қилди. Майдонда ҳақиқий жангчи сифатида гавдаланадиган футболчининг охирги клуби “Навбаҳор” эди. Аммо у ерда жароҳати сабабли ўтган йили ўзи истагандек ўйнай олмади. Бу йил жароҳатидан фориғ бўлди ва “Бухоро”нинг таклифини қабул қилди. “Пахтакор” клубида тарбияланган ва ушбу жамоада бир неча йилни ўтказган ҳимоячи кейинчалик “Локомотив” ва “Навбаҳор” учун ўйнаб келди. Энди фаолиятида илк бор про лигада “Бухоро” шарафини ҳимоя қилган ҳолда жамоани Суперлигага қайтариш учун курашади.  

Фозил Мусаев

Про лигадаги топ-трансферлардан бири яна “Бухоро” билан боғлиқ. Тажрибали ярим ҳимоячи Фозил Мусаев ҳам Даврон Ҳошимов, Виталий Денисов каби фаолиятида илк бор про лигада тўп суришга рози бўлди. 35 ёшни қаршилаган Мусаев ўтган йили “Нефтчи”да тўп сурди. Умуман, Фозил фаолиятида бир қатор жамоалар шарафини ҳимоя қилди. “Бухоро” эса унинг учун янги саҳифага айланмоқда. Ўтган турда Қўқондаги марказий ўйинда Фозилнинг ягона голи эвазига “Бухоро” сафардан қимматли уч очко билан қайтди.

Марко Колакович

Бу йил “Бухоро”га қўшилган янги футболчилар орасида сербиялик ҳимоячи Марко Колакович ҳам бор. 2020 йилдан 2023 йилгача “Сўғдиёна”да тўп сурган футболчи ўтган вақт давомида Улуғбек Бақоев қўли остида ҳам ўйнаган. Шу сабабли мураббий “Бухоро”да ҳам Колаковични кўришни истади ва про лигада ушбу мақсадига эришди.

Шуҳратбек Жўраев.