Ronalduning "toychoqlari". Yoxud portugaliyalik yulduzning avtomashinalari haqida gaplashamiz
Krishtianu Ronaldu nafaqat dunyoning eng sovrindor, balki eng boy sportchilaridan biri hamdir. Joriy hafta 36 yoshli portugaliyalik futbolchi Turindan o‘zining qimmatbaho avtomobillarini olib chiqib ketayotgani haqida xabarlar tarqaldi. Bu esa uning “Yuventus”dan ketish ehtimoli juda yuqori ekanidan dalolatdir. Ammo biz bugun uning faoliyati haqida emas, balki qimmatbaho avtomobillari haqida gaplashamiz. Xo‘sh, Ronalduning garajida qanday turdagi mashinalar bor?
BUGATTI CHIRON va VEYRON
Ushbu mashinalar Ronalduning kollektsiyasidagi eng qimmatlari hisoblanadi. Ronaldu BUGATTI bilan tezlik zavqini his qiladi, hech kim bu mashinaning chinakam tezligiga dosh berolmasligi aniq. Uning maksimal tezligi soatiga deyarli 500 kilometrni tashkil etadi. CHIRON hozirda dunyodagi eng qimmat mashinalardan biri, uning narxi qariyb 3 million dollarni tashkil etadi! VEYRON allaqachon eski modelga aylangan. Uning qiymati 1,3 million dollarga teng.
LAMBORGHINI AVENTADOR LP 700-4
Ronaldu nafaqat oltin to‘plar va butsalar, balki oltin rangdagi mashinalarni ham yaxshi ko‘radi. Soatiga 349 kilometrgacha tezlasha oladigan sportkarning narxi 400 ming dollardan oshadi. Ha, u oltin rangda.
MASERATI GRANCABRIO
Krishtianu Italiya avtomobilsozlik sanoatini yaxshi ko‘radi. U 2021 yilda 355 ming dollarga qulay kabriolet sotib oldi. Eng kuchli dvigatelning guvillashidan zavqlanib, Turin havosidan ozgina nafas olmoqchi bo‘lganingizda ushbu avtomobil sizga juda ham mos tushadi.
FERRARI 599 GTO
Umuman olganda, Ronalduning kollektsiyasida kamida uchta FERRARI mavjud va ular orasida 599 GTO eng «ekstremal» hisoblanadi. Ushbu avtomobil haqiqiy san’at asari. Ushbu mashina 100 km soat tezlikka bor yo‘g‘i 3,3 soniyada chiqa oladi. Shu bilan birga FERRARI 599 GTO o‘z sinfiga mansub avtomobillar orasida eng qulaylaridan biri ekanligi aytiladi.
MERCEDES BENZ GLE63S AMG
Krishtianuda Italiya avtolaridan tashqari nemis ulovlari ham bor. Ushbu GLE63S AMG bir vaqtning o‘zida tank kabi harakatlanishi mumkin, ammo agar xohlasa, u sport avtomobili kabi tezlasha oladi. Ammo uning narxi Ronalduning boshqa mashinalaridan ancha arzonroq. Ushbu Mersedes 115 ming dollar turadi.
MERCEDES BENZ G-WAGON BRABUS
Ronalduning sevgilisi Jorjina Rodriges uning 35 yoshli tavallud ayyomiga 650 ming dollar turadigan MERCEDES BENZ G-WAGON BRABUS avtomobilini sovg‘a qildi.
RANGE ROVER SPORT
Ronalduning kollektsiyasida yana bir katta mashina bor. U Turindagi bazaga bir necha bor aynan RANGE ROVER avtomobilida tashrif buyurdi. Uning narxi ancha oddiy - atigi 120 ming dollar.
ASTON MARTIN DB9
Ronaldu agent Jeyms Bond kabi ASTON MARTIN avtomobiliga ega. 540 ot kuchiga va V-12 dvigateliga ega bu mashina tezlikning haqiqiy namunasi. Bunday jozibador avtomobil 200 ming dollardan sal qimmatroq turadi.
BENTLEY GT SPEED
Krishtianuning kollektsiyasidagi yana bir "britaniyalik" bu BENTLEY GT SPEED avtomobilidir. Ronaldu kamdan-kam hollarda ushbu avtomobilni boshqaradi, garchi u ASTON MARTIN mashinasidan yomon bo‘lmasa ham. Ularning narxi bir xil. BENTLEY GT SPEEDning narxi ham 200 ming dollar atrofida turadi.
ROLLS ROYCE PHANTOM
ROLLS ROYCE ko‘p yillardan buyon hashamatli avtomobillar sirasiga kiradi. Ronaldu o‘zining "PHANTOM"ini 2008 yilda sotib olgan va u hali ham portugaliyalikning kollektsiyasida saqlanmoqda. U bu mashina uchun yarim million dollar to‘lagan.
AUDI R8
Boshqa avtomobillarning fonida AUDI byudjet variantiga o‘xshaydi, ammo Ronalduning so‘zlariga ko‘ra, bu mashina soddaligi va qulayligi bilan unga yoqadi.
CHEVROLET CAMARO
Ronalduning barcha mashinalari ichida eng arzoni. U uni 2016 yilda atigi 35000 funtga sotib olgan. Qizig‘i shundaki, Krish ushbu mashinani oilaviy avtomobil, deb hisoblaydi.
BUGATTI CENRODIECI
Ushbu mashina hali chiqarilmagan, ammo Krishtianu Ronaldu uni allaqachon buyurtma qilib qo‘ygan. Hammasi bo‘lib, ushbu mashina 10 dona ishlab chiqariladi. Ularning har biri 8 million evroni tashkil qiladi. 16 tsilindrli dvigatel ushbu mashina 2,4 soniyada 100 kilometrgacha tezlik oladi, 6,1 soniyada esa 200 km soat tezlikka erishadi. Ronaldu ushbu avtomobilni 2022 yilgacha kutishiga to‘g‘ri keladi.
Ishoning, bular Krishtianu kollektsiyasidagi mashinalarning barchasi emas. Mish-mishlarga ko‘ra, ularning soni ellikdan ortiqni tashkil etadi. Bir kun kelib u bemalol o‘z mashinalaridan muzey ochishi ham mumkin.
Fikrlar