“Сити” юлдузи: “Барса”га ўтганим маъқул, “Реал”га эмас

“Манчестер Сити”нинг энг ёрқин ўйинчиларидан Бернарду Силва ёзги трансферлар вақтида “Барселона”га кўчиб ўтиши мумкин.

Аслида бу футболчига бир неча клуб, хусусан, “Реал” ҳам даъвогарлик қилмоқда. Мадридликлар Силва учун курашда фаворит ҳисобланаётган эди.

Бернарду Силва майдонда қандай ўйин кўрсатишидан қатъи назар, унга Англия шароити у қадар маъқул келмаяпти ва ўзини ноқулай сезаётгани айтилмоқда.

SPORT нашрининг ёзишича, “Манчестер Сити”да барча ютуқларни қўлга киритиб бўлган футболчи энди муҳитни ўзгартиришга қарор қилган. Унинг ўзи “Барселона”ни маъқул кўрмоқда. Бунга бир неча сабаблар бор. Хусусан, Бернардуга Барселона шаҳри жуда ёқади.

Бундан ташқари, бу жамоада унинг “Сити”да бирга ўйнаган дўсти Илкай Гюндоған, Португалия терма жамоасидаги шериклари Жоау Феликс ва Жоау Канселу бор. Каталонияликлар томонидан ижарага олинган бу икки португалиялик адашлар келаси мавсум ҳам жамоада қолиш эҳтимоли катта.

Энг асосийси эса, Бернарду Силва “Реал” таркибида ўзига аниқ жой йўқлиги ва бунинг оқибатида ўйин амалиётисиз қолиб кетиши мумкинлигини яхши билгани учун ҳам “Барселона” вариантини маъқул кўрмоқда.