Tezkor xabar! Xabib Nurmagomedov faoliyatini yakunlaganini e’lon qildi

Hozirgina Abu-Dabida "UFC 254" musobaqasining markaziy jangi bo‘lib o‘tdi. Unda Habib Nurmagomedov amerikalik Jastin Getji bilan jang o‘tkazdi.

Jangning ikkinchi raundida Habib Nurmagomedov bo‘g‘ish usuli evaziga raqibini taslim etdi. G‘alabadan so‘ng, Nurmagomedov faoliyatini yakunlaganligini rasman e’lon qildi.

Habib Nurmagomedovning xarakterini inobatga olsak, bu aniqqa o‘xshaydi. Chunki u piar uchun qandaydir gaplarni o‘ylab topmaydi va bu boradagi qarorini oktagonda aytdi hamda UFC prezidenti Dana Uaytga ishora qildi. Demak, bu oldindan o‘ylangan fikr.

Shu tariqa, Habib uchun Abu-Dabida tashkil etilgan "UFC 254" musobaqasidagi Getjiga qarshi jang faoliyatidagi oxirgisiga aylandi. U UFC bilan xayrlashdi va 29 ta g‘alaba bilan mutlaq chempion sifatida faoliyatini yakunladi.