Йил якунига қадар профессионал бокс оламида 3 та супер тўқнашув бўлиб ўтади! (Анонс)

2023 йил ҳам тобора ўз якунига етиб бормоқда. Жорий йил профессионал бокс оламида қизиқарли жангларнинг гувоҳига айландик ва бизни яна декабрь ойида учта супер жанг кутиб турибди. Албатта, яна бир қатор қизиқарли тўқнашувлар ўрин олган. Бироқ, уларнинг даражаси юқоридаги учта қарама-қаршиликчалик деб бўлмайди... Демак:

23 декабрь, Саудия Арабастони, Ар-Риёд.

Энтони Жошуа (Буюк Британия, 26-3,23 КО) – Отто Валлин (Швеция, 26-1,14 КО)

- Оғир вазн тоифасида собиқ жаҳон чемпиони Жошуа Александр Усикка бой берилган икки жангдан сўнг, кетма –кет, Жермейн Франклин ва Роберт Хеллениусни мағлуб этди. Бироқ, Отто нисбатан кучлироқ рақиб ва у жиддий қаршилик кўрсатиши мумкин. У сўнги жангида россиялик Мурат Гассиевни ҳам мағлуб эта олди. Хуллас, қизиқарли жангни гувоҳига айланамиз.

23 декабрь, Саудия Арабастони, Ар-Риёд.

Деонтей Уайлдер (АҚШ, 43-2-1, 42 КО) – Жозеф Паркер (29-2,20 КО)

- Профессионал бокс оламида жуда кучли зарбаси билан танилган Уайлдернинг жангини соғинганлар ҳам кўпчиликни ташкил қилади. У Тайсон Фьюри билан сўнги икки жангидаги мағлубиятдан кейин. “Қайтиш” жангини ўтказди ва Роберт Хеллениусни нокаутга учратганди. Шу тариқа у 1 йиллик танаффусдан сўнг яна рингга қайтмоқда. Паркер ҳам яхши савиядаги боксчи саналади. У уч мағлубиятини Жо Жойс, Энтони Жошуа ва Диллиан Уайтдан қабул қилиб олган. Юқорида айтиб ўтганимиздек, Паркер яхши атлет, бироқ бу жангда фаворит барибир Уайлдер саналади. Аммо бу профессионал бокс ва боз устига оғир вазн тоифаси. Натижа қандай бўлишидан қаътий назар, мухлислар асло зерикиб қолмайди.

26 декабрь, Япония, Токио.

Наоэ Иноуэ (25-0,22 КО) – Марлон Тапалес (35-3,18 КО)

- Биринчи ярим енгил вазн (55,3 кг) тоифасида мутлақ жаҳон чемпионлиги учун ўтказиладиган жанг. Япониялик “Монстр” вазнини кўтариб, бу дивизионда ҳам ҳукмронликни тўлалигича ўрнатмоқчи. Рақиб Марлон Тапалес ўзбекистонлик бокс ихлосмандаларига яхши таниш. У Мурорджон Аҳмадалиевдан IBF ва WBA чемпионлик камарларини тортиб олганди. Иноуэ эса Стивен Фултонни мағлуб этиб, WBC ва WBO камарларига эга чиққанди. Хуллас, супер тўқнашув! Аммо, барчаси Иноуэ учун ташкил қилингандек, чунки жанг Японияда ўтказилади. Бу ҳам “Монстр” учун плюс жиҳат. Қолаверса, унинг имконияти ҳам Тапалесдан юқори баҳоланмоқда. Шубҳасиз, фаворит Иноуэ! Кўрамиз, Тапалес профессионал боксдаги бу иқтидорга қарши қандай чора қўллар экан,..