ЦСКАнинг икки футболчиси Европага кетишга тайёр. Улар кимлар?
ЦСКА Россия Премьер-лигасида юқори ўринлар учун курашмоқда. Владимир Федотов шогирдлари ҳозирча мусобақа жадвалида тўртинчи поғонада бормоқда.
“Армиячилар”ни учинчи ўриндаги “Динамо”дан атиги бир очко ажратиб турибди ва бу чемпионатнинг қолган қисми қизғин давом этишидан далолат беради.
Чемпионат ва кубок ўйинларида ЦСКАнинг муваффақиятини таъминлаётган футболчиларга Европанинг турли клубларидан қизиқиш бўлаётгани ҳақида маълумотлар тарқатилмоқда. Хусусан, Аббосбек Файзуллаевни “Бавария” ва “Парма” кузатаётгани, легионеримизнинг ҳужум чизиғидаги шериги Фёдор Чалов “Монако” нишонига тушгани ҳақидаги хабарлар кўп муҳокама қилиняпти.
“Армиячилар”нинг бразилиялик легионери Келлвен жамоадошлари орасидан икки нафари Европанинг кучли лигаларида ўйнашга тайёрлигини таъкидлади.
- Чалов Европага кетадиган пайт келдими? Бунга ҳеч қандай шубҳа йўқ. Фёдорнинг ўзи Европада ўйнашни орзу қилади. У ажойиб ўйинчи.
ЦСКАдагилардан нафақат Чалов, балки Иван Обляков ҳам Европага кўчиб ўтишга тайёр, деб ўйлайман.
Уларнинг ҳар иккиси ҳам Европанинг кучли чемпионатларида ўйнай олиш имкониятига эга, - деди Келлвен.
Фёдор Чалов ЦСКА клуби академиясининг тарбияланувчиси ҳисобланади. Асосий жамоага 2016 йили қабул қилинган. Ўшандан бери моҳир ҳужумчи “армиячилар” сафида 253 та учрашувда майдонга тушиб, ўз ҳисобига 86 та гол ва 43 та ассист расмийлаштирди.
Transfermarkt портали 26 ёшли футболчини 12 миллион еврога баҳоламоқда.
Иван Обляков эса, ЦСКАда 2018 йилнинг ёзидан бери ўйнамоқда. Ҳужумкор футболчи ҳозиргача 204 та учрашувда қатнашиб, 20 та гол ва 34 та ассист қайд этди.
Келлвеннинг ўзи “армиячилар” сафига 2023 йилнинг ёзида келган. Ўтган йили ёзда ЦСКА клуби учта трансферни амалга ошириб, Келлвен, Виктор Давила ва Аббосбек Файзуллаевни ўз таркибига қўшиб олганди. Ҳозир ҳар учала чарм тўп устаси асосий таркибнинг муқим ўйинчиси саналади.
Фикрлар